தியா சாக்கோ டார்ட் (Diya choco tart)

60 கிராம் உப்பு சேர்த்த வெண்ணெயுடன், 2 மேஜைக்கரண்டி பொடித்த சர்க்கரை மற்றும் ஒரு கப் மைதா மாவு சேர்க்கவும்.

இதனை கலந்து கொள்ளவும், கூடவே ஒரு மேஜைக்கரண்டி தண்ணீர் சேர்த்து, அழுத்தமில்லாமல் பிசைந்து கொள்ளவும்.

சிறிது பிசைந்த பின் மீண்டும் ஒரு மேஜைக்கரண்டி தண்ணீர் சேர்த்து மாவை உருட்டி கொள்ளவும்.

ஒரு பட்டர் பேப்பரின் மீது சிறிது மைதா மாவு தூவி பிசைந்த மாவை அதன் மீது வைக்கவும். இதற்கு மேல் மற்றொரு பட்டர் பேப்பரை வைத்து மூடவும். விரல்களைக் கொண்டு சிறிது தட்டி விடவும்.

அதற்குப்பின் சப்பாத்தி கட்டையில் வைத்து மிருதுவாக தேய்த்துக் கொள்ளவும்(3 mm thickness). பட்டர் பேப்பரை எடுத்து விட்டு குக்கி கட்டர் வைத்து கட் செய்து கொள்ளவும்.

வெட்டி எடுத்த மாவை ஒரு சிலிகான் கப் கேக் மோல்டின் அடியில் வைத்து படத்தில் காட்டியுள்ளபடி கிண்ண வடிவில் அழுத்தி விடவும்.

இவ்வாறு தயார் செய்த அனைத்தையும் பேக்கிங் ட்ரேயில் அடுக்கி வைக்கவும். ஓ.டி. ஜியை 160 டிகிரி செல்சியஸில் 10 நிமிடம் பிரிஹீட் செய்யவும்.அதன் பின் பேக்கிங் ட்ரேயை வைத்து 160 டிகிரி செல்சியஸில் 20 நிமிடம் பேக் செய்யவும்.

மீதமுள்ள மாவை மீண்டும் தேய்த்து குக்கி கட்டர் உபயோகித்து குக்கீஸ் வெட்டி எடுக்கலாம்.ஓ.டி.ஜி இல்லாதவர்கள் படத்தில் காட்டியுள்ளபடி சிறிய கிண்ணத்தின் அடிப்பகுதியில் வைத்து அழுத்தம் கொடுத்து தயார் செய்யவும். ஒரு குக்கரை 5 நிமிடம் குறைவான தீயில் பிரீ ஹீட் செய்யவும். அதன்பின் உள்ளே ஒரு ஸ்டாண்ட் வைத்து அதன்மீது ஒரு தட்டை வைத்து தயார் செய்த குக்கீகளை அடுக்கி வைக்கவும். ரப்பர் மற்றும் விசில் எடுத்துவிட்டு குக்கரை மூடி 20 நிமிடம் சிறு தீயில் பேக் செய்யவும்.

இப்போது ஒரு பெரிய பாத்திரத்தில் தண்ணீர் கொதிக்க வைக்கவும். அதற்குள் மற்றொரு கிண்ணம் வைத்து 20 கிராம் வெள்ளை சாக்லேட் சேர்த்து டபுள் பாயில் முறையில் உருக்கவும். உருகிய சாக்லேட்டில் 3 சொட்டு ஆரஞ்சு நிறம் சேர்த்து கலக்கி விடவும்.

இதனை ஒரு ஃபாயில் கவரில் சேர்த்து பட்டர் பேப்பரின் மீது திரியை போல் டிசைன் செய்து கொள்ளவும். தயாரித்த சாக்லேட் வடிவங்களை ஃப்ரீசரில் வைத்து விடவும்.

பேக் செய்த குக்கீகளை சிலிகான் மோல்டில் இருந்து எடுத்து கம்பி இராக்கின் மீது ஆற வைக்கவும்.

இப்போது அதே கொதிக்கும் தண்ணீரில் மற்றொரு கிண்ணத்தில் 120 கிராம் டார்க் சாக்லெட் சேர்த்து உருக்கவும். இதோடு ஒரு மேஜைக்கரண்டி பொடித்த சர்க்கரை, ஒரு மேஜைக்கரண்டி தண்ணீர் சேர்க்கவும்.

நன்கு உருகிய சாக்லேட் கலவையை தயார் செய்த பிஸ்கட் கிண்ணத்தில் ஒரு தேக்கரண்டி ஊற்றவும். அதன் மீது சிறிது நறுக்கிய பாதாம் பருப்பை சேர்க்கவும்.

மீண்டும் அதன் மீது ஒரு தேக்கரண்டி சாக்லேட் கலவையை ஊற்றவும். இதனை ஐந்து நிமிடம் செட் செய்ய விடவும். அதன்பின் ஃப்ரீசரில் வைத்த திரிகளை எடுத்து நடுவில் வைக்கவும். அலங்கரிக்க சிறிது வெள்ளி நிற ஸ்ப்ரிங்கில்ஸ்களை தூவி விடவும். இவ்வாறு அனைத்தையும் தயார் செய்து கொள்ளவும். எனக்கு இது போன்ற 12 விளக்குகள் கிடைத்துள்ளன.

முற்றிலும் புதுமையான சாக்லேட் விளக்கு அனைவரையும் கவரும் விதத்தில் தயார். இந்த தீபாவளியை வண்ணங்களுடன் கொண்டாடி மகிழலாம். அனைவருக்கும் இனிய தீபாவளி நல்வாழ்த்துக்கள்.