குக்கர் சிக்கன் பிரியாணி

கோழிக்கறியை நன்கு கழுவி சுத்தம் செய்து தண்ணீர் வடித்துக் கொள்ளவும். பாஸ்மதி அரிசியை இரண்டு முறை தண்ணீரில் கழுவி மூன்றாவது தண்ணீரில் 20 நிமிடம் ஊறவைக்கவும்.

குக்கரை அடுப்பில் வைத்து எண்ணெய் சேர்த்து காய்ந்ததும் பிரியாணி இலை பட்டை கிராம்பு ஏலக்காய் சேர்த்து தாளிக்கவும். பிறகு நீளமாக நறுக்கிய பெரிய வெங்காயம் சேர்த்து வதக்கவும். எடுத்துள்ள கொத்தமல்லி புதினாவை மூன்றாக பிரித்து ஒரு பங்கை வெங்காயத்துடன் சேர்த்து வதக்கவும். வெங்காயம் வதங்க தேவையான அளவு உப்பு சேர்க்கவும். நீளமாக வெட்டிய தக்காளி மற்றும் கீறிய பச்சை மிளகாய் சேர்த்து வதக்கவும்.

இஞ்சி பூண்டு, கசகசா, சோம்பு இவற்றை அரைத்து விழுதை சேர்க்கவும். மற்றொரு பங்கு மல்லி புதினா இலைகளை சேர்த்து நன்கு பச்சை வாசனை போகும் வரை வதக்கவும். பிறகு மிளகாய்த்தூள் கரம் மசாலாத்தூள் மற்றும் சீரகத்தூள் சேர்த்து வதக்கவும்.

வதக்கியதும் சிக்கன் துண்டுகளை சேர்த்து இதற்குத் தேவையான அளவு உப்பு மற்றும் தண்ணீர் கூடவே எலுமிச்சை பிழிந்து நன்கு 2 நிமிடம் வதக்கவும்.

வதக்கிய பின் ஒரு பங்கு அரிசிக்கு ஒன்னே முக்கால் பங்கு தண்ணீர் விதத்தில் தண்ணீர் சேர்த்து கொதிக்கவிடவும். ஊறவைத்த அரிசியை வடித்து கொதிக்கும் பிரியாணி தண்ணீரரல் சேர்த்து கூடவே நெய் சேர்க்கவும்.

மீதமுள்ள மல்லி புதினா இலைகளை சேர்த்து, தேவைப்பட்டால் உப்பு சேர்த்து குக்கரை மூடி ஆவி வந்த பின் விசில் போட்டு சிறு தீயில் 10 நிமிடம் வேக விட்டு அடுப்பை அணைக்கவும்.

விசில் அடங்கிய பின் குக்கரை திறந்தால் பொலபொலவென்று பாஸ்மதி அரிசி பிரியாணி குக்கரில் சூப்பராக தயாராகி இருக்கும். மிகுந்த சுவை மற்றும் மனத்துடன் இருக்கக்கூடிய இந்த பிரியாணியுடன் தயிர் பச்சடி வைத்து சாப்பிட்டால் சுவையாக இருக்கும்.