அரபுநாட்டு சிக்கன் மந்தி பிரியாணி மற்றும் சல்சா

குங்குமப்பூவை சூடான தண்ணீரில் ஊற வைக்கவும். காய்ந்த எலுமிச்சையை உடைத்து உள்ளிருக்கும் விதைகளை எடுத்து விடவும். ஒரு பேனை சூடு செய்து இதில் குறிப்பிட்டுள்ள பிரியாணி மசாலா பொருட்கள் அனைத்தையும் சேர்த்து மிதமான தீயில் வாசனை வரும் வரை வறுக்கவும். அடுப்பை அணைத்துவிட்டு மஞ்சள் தூள் சேர்த்து கிளறி ஆற விட்டு மிக்ஸியில் நைஸாக அரைத்துக் கொள்ளவும்.

சிக்கல் பெரிய துண்டுகளாக எடுத்துக்கொள்ள வேண்டும். இதனை ஆழமாக கட் செய்து கொள்ளவும். சிக்கன் ஊறவைக்க குறிப்பிட்டுள்ள பொருட்கள் அனைத்தையும் சேர்த்து நன்கு கலந்து கொள்ளவும். இதனை இரண்டு அல்லது மூன்று மணி நேரம் ஊற வைக்கவும்.

ஒரு கடாயில் 1.5 லிட்டர் தண்ணீர் சேர்த்து, அதன் மேல் அரிசி சல்லடையை வைத்து சூடாக்கவும். இதில் ஊற வைத்த சிக்கன் துண்டுகளை வைத்து மூடி போட்டு 30 நிமிடம் மிதமான தீயில் வேக விடவும். மறக்காமல் 15 நிமிடம் கழித்து சிக்கனை திருப்பி போட்டு வேகவிடவும். அடுப்பை அணைத்த பின் கடாயில் இருக்கக்கூடிய சிக்கன் ஸ்டாக் ஐ சேமித்து வைக்கவும் அரிசி வேக வைக்க உபயோகித்துக் கொள்ளலாம்.

ஒரு பானில் 2 மேஜைக்கரண்டி வெண்ணெயை சேர்த்து சூடானதும் ஆவியில் வெந்த சிக்கன் துண்டுகளை பரவலாக வைத்து கிரில் செய்யவும். நெருப்பை அதிகமாக வைத்து சமைக்கவும். மறுபக்கம் திருப்பி போட்டு கிரில் அச்சு விழும் வரை சமைத்து அடுப்பை அணைக்கவும். மூன்று முதல் ஐந்து நிமிடத்தில் கிரில் செய்துவிடலாம்.

இப்பொழுது பிரியாணி செய்வதற்காக அகலமான பாத்திரத்தை அடுப்பில் வைத்து சூடானதும் எண்ணெய் சேர்க்கவும். இதில் பிரியாணி இலை, பட்டை,கிராம்பு, ஏலக்காய், காய்ந்த எலுமிச்சை சேர்த்து தாளிக்கவும். பூண்டைத் தட்டி சேர்த்து வதக்கவும். கூடவே பச்சை மிளகாய் விழுது, பெரிய வெங்காயம் சேர்த்து வதக்கி பின் தக்காளி மற்றும் பிரியாணி மசாலா சேர்த்து தக்காளி மசியும் வரை வதக்கிக் கொள்ளவும். பிறகு அரை மணி நேரம் ஊற வைத்த பாசுமதி அரிசியை தண்ணீர் வடித்து இதில் சேர்த்து 2 நிமிடம் கலக்கவும்.

பிறகு குறிப்பிட்டுள்ள சிக்கன் ஸ்டாக் சேர்த்து மூடி போட்டு மிதமான தீயில் அரிசியை வேக வைக்கவும். அரிசி மற்றும் தண்ணீர் சமநிலையில் வரும் பொழுது இரும்பு தோசைக் கல்லை அடுப்பில் வைத்து சூடாக்கி அதன் மேல் பிரியாணி பாத்திரத்தை வைத்து தம்முக்கு வைக்கவும். மூடி போட்டு குறைவான தீயில் 5 நிமிடம் தம் விடவும்.

பிறகு இதன் மேல் ரெடி செய்த சிக்கன் துண்டுகளை பரவலாக வைத்து நடுவில் ஒரு கிண்ணத்தில் எரிந்த கறியை வைத்து இதில் கொஞ்சம் நெய் விட்டு மூடி போட்டு மேலும் 5 நிமிடம் சிறு தீயில் தம்முக்கு விடவும். அடுப்பை அணைத்து விடவும். பரிமாறும் முன் சிக்கன் துண்டுகளை முதலில் ஒரு தட்டிற்கு மாற்றி வைக்கவும் பிறகு பிரியாணி பரிமாறி அதன் மேல் சிக்கன் வைக்கலாம். அதற்குமேல் எண்ணெய் அல்லது நெய்யில் முந்திரி மற்றும் பாதாமை வருத்து இதன் மேல் தூவவும்.

மந்தி பிரியாணிக்கு பொருத்தமான சட்னி தயாரிக்க கொடுக்கப்பட்டுள்ள பொருட்கள் அனைத்தையும் மிக்ஸியில் சேர்த்து பல்ஸ் மோடில் நறநறவென்று அரைத்துக் கொள்ளவும். எலுமிச்சையை பிழிந்து கொள்ளவும்.

மிகவும் சுவையான இந்த மந்தி பிரியாணி காரம் குறைவாகவும், மசாலா வாசனையுடன் புதுவித ருசியாக இருக்கும். இதோடு சாப்பிடக்கூடிய மந்தி சட்னி புளிப்பு தன்மையோடு பிரியாணிக்கு பொருத்தமாக இருக்கும். நீங்களும் மறக்காமல் முயற்சித்துப் பாருங்கள்.