டபுள் டக்கர் மாம்பழ லட்டு (Double Takkar Mango Laddu)

முதலில் நன்கு பழுத்த மாம்பழத்தை தோல் சீவி உள்ளே இருக்கும் பழத்தை மிக்ஸியில் சேர்த்து விழுதாக அரைத்து வைக்கவும்.

ஒரு பெரிய தேங்காயை சில்லு சில்லாக உடைத்து, தோலை முழுவதுமாக சீவி வெள்ளையாக வைக்கவும்.

தண்ணீர் சேர்க்காமல் மிக்ஸியில் தூளாக அரைத்து எடுத்து, ஒரு வாணலியில் எண்ணெய் சேர்க்காமல் நன்றாக மிதமான தீயில் 10 நிமிடங்கள் கிளறிக்கொண்டே இருக்கவும். இதுதான் உலர்த்தப்பட்ட தேங்காய் (டேசிக்கேட்டேட் கோக்கனட்)

பிறகு மிக்ஸியில் 1.5 கப் உலர்த்தப்பட்ட தேங்காய், 1 கப் சர்க்கரை மற்றும் 1 கப் பால் சேர்த்து நன்றாக அரைத்து வைக்கவும்.

அரைத்த விழுதை ஒரு தவாவில் சேர்த்து மிதமான தீயில் நன்றாக கிளறி விட்டு வேகவிடவும். 20 நிமிடங்கள் வரை நடுநடுவே நன்றாக கிளறிவிட்டு, சுருண்டு ஒட்டாமல் வரும் வரை விடவும்.

பிறகு அதனுடன் முதலில் அரைத்து வைத்த மாம்பழம் விழுதையும் சேர்க்கவும். நன்றாக கலந்துவிட்டு மேலும் 20 நிமிடங்கள் வரை நடுநடுவே கிளறி விட்டு சுருண்டு வரும் வரை வைக்கவும்.

கலவை சேர்ந்து கெட்டியான பதத்திற்கு வந்தவுடன், அடுப்பை அணைத்து நன்றாக ஆறவிட்டு அளவான உருண்டைகளாக பிடிக்கவும். உருட்டும் பொழுது அதிலேயே எண்ணெய் போன்று வரும்.. தனியாக நெய் எதுவும் சேர்க்கத் தேவையில்லை.

பிறகு உள்ளே வைக்கும் நட்ஸ் ட்விஸ்ட் செய்வதற்கு, 25 கிராம் வறுத்த தோலுரித்த வேர்க்கடலை, பாதாம், முந்திரி, 1 கப் உலர்த்தப்பட்ட தேங்காய் மற்றும் 3 டேபிள்ஸ்பூன் ஏலக்காய் சேர்த்து பொடித்த சர்க்கரை..
அனைத்தையும் மிக்ஸி ஜாரில் சேர்த்து கொரகொரப்பாக சிறிதளவு பால் சேர்த்து அரைத்தெடுக்கவும்.

அரைத்த கலவையை சிறு சிறு உருண்டைகளாக பிடித்து வைக்கவும். பிறகு முதலில் செய்து வைத்த மாம்பழ உருண்டையை கையில் வைத்து அழுத்தி கிண்ணம் போல் செய்து, நட்ஸ் உருண்டையை நடுவே வைத்து அப்படியே சேர்த்து ஒரே உருண்டையாக உருட்டி பிடிக்கவும்.

வெடிப்புகள் இல்லாத உருண்டைகளாக அனைத்தையும் பிடித்து வைக்கவும். சுவையான வித்தியாசமான டபுள் டக்கர் மாம்பழ நட்ஸ் லட்டு ரெடி😋😋😋