முட்டை சுக்கா

மூன்று முட்டையை ஒரு பாத்திரத்தில் உடைத்து ஊற்றிக் கொள்ளவும். பிறகு அதில் முட்டைக்கு தேவையான தூள்உப்பு 1/4 ஸ்பூன் மிளகுத் தூளை போடவும்.

பிறகு கால் ஸ்பூன் மஞ்சள் தூள் போட்டு நன்றாக முட்டையை அடித்துக் கொள்ளவும்.

இரண்டு தக்காளி பழத்தை ஒரு மிக்ஸி ஜாரில் நறுக்கிப் போட்டு நைசாக அரைத்துக் கொள்ளவும்.

ஒரு பாத்திரத்தை எடுத்துக் கொள்ளவும். அதன் உள்புறம் எண்ணெய் தடவிக் கொள்ளவும். பிறகு கலந்து வைத்திருக்கும் முட்டை கரைசலை அதில் சுற்றவும்.

அடுப்பில் ஒரு கடாயை வைத்து அதன் உட்புறத்தில் தண்ணீர் ஊற்றி அதன் மேல் ஒரு தட்டை வைத்து கரைத்து வைத்திருக்கும் முட்டை கலவை பாத்திரத்தை அதன் மேல் வைத்து ஒரு தட்டு போட்டு மூடி எட்டு நிமிடம் வேக விடவும்.

முட்டை வெந்த பிறகு 5 நிமிடம் ஆற வைத்து அதைச் சின்னச் சின்ன துண்டுகளாக பீஸ் போட்டு எடுத்து வைத்துக் கொள்ளவும்.

அடுப்பில் ஒரு கடாயை வைத்து இரண்டு ஸ்பூன் நல்லெண்ணெய் ஊற்றி எண்ணெய் சூடானதும் பட்டை,கிராம்பு, சோம்பு போட்டு தாளிக்கவும். பிறகு பொடியாக நறுக்கிய பெரிய வெங்காயம், கறிவேப்பிலை போட்டு வதக்கவும்.

பிறகு ஒரு ஸ்பூன் இஞ்சி பூண்டு விழுதை போட்டு வதக்கவும் பிறகு அரைத்து வைத்திருக்கும் தக்காளி விழுதை அதில் ஊற்றி பச்சை வாசனை போகும் வரை 1 நிமிடங்கள் வதக்கவும்.

பிறகு அதில் 1/4 ஸ்பூன் மஞ்சள் தூள்,1 ஸ்பூன் மிளகாய்தூள், 1ஸ்பூன் மல்லித் தூள், 1/4 ஸ்பூன் மிளகுத்தூள் போட்டு ஒரு நிமிடம் வதக்கவும். பிறகு ஒரு டம்ளர் தண்ணீர் ஊற்றி தேவையான அளவு உப்பு போட்டு கொதிக்க விடவும்.

தண்ணீர் வற்றி கிரேவி பதத்திற்கு வந்தவுடன் முட்டை துண்டுகளை அதில் போட்டு 5 நிமிடம் கிளறி கொண்டே இருக்கவும்.பிறகு கொத்தமல்லி தழை தூவி பரிமாறவும்.

சுவையான முட்டை சுக்கா தயார். இதை சப்பாத்தி, பூரி, சாதத்துக்கு சைட் டிஷ் ஆக வைத்துக் கொள்ளலாம்.