கேரட் முள்ளங்கி ஊறுகாய்🥕🥕

முதலில் ஒரு கடாயில் ஒரு டீஸ்பூன் கடுகு,ஒரு டீஸ்பூன் சீரகம், ஒரு டீஸ்பூன் வரக்கொத்தமல்லி, ஒரு டீஸ்பூன் சோம்பு, கால் டீஸ்பூன் ஓமம் மற்றும் அரை டீஸ்பூன் வெந்தயம் சேர்த்து குறைவான தீயில் நன்கு வாசம் வரும் வரை வறுத்துக் கொள்ளவும். இவற்றை ஆறவைத்து மிக்ஸியில் கரகரப்பாக அரைத்துக் கொள்ளவும். ஊறுகாய் மசாலாத்தூள் இப்போது ரெடி. இதை தனியாக எடுத்து வைத்துக் கொள்ளவும்.

ஒரு பெரிய வாணலியில் கால் கப் எண்ணெய் ஊற்றி ஒரு சிட்டிகை பெருங்காயத் தூளை சேர்க்கவும். மற்றும் ஒரு இன்ச் பொடியாக அரிந்த இஞ்சி சேர்க்கவும்.அதனுடன் அரிந்த மூன்று பூண்டு பல் மற்றும் இரண்டாக அரிந்த 2 மிளகாய்களை சேர்த்து லேசாக வதக்கவும்.

இவற்றுடன் படத்தில் காட்டியுள்ளபடி நீளவாக்கில் அரிந்த ஒன்றரை கப் முள்ளங்கி மற்றும் கேரட்டை சேர்க்கவும். ஒரு நிமிடம் வதக்கவும். தொடர்ந்து காய்கள் லேசாக சுருங்கும் வரை வதக்கவும்.

இப்போது அடுப்பை குறைவான தீயில் வைக்கவும். இதில் அரைத்த ஊறுகாய் மசாலாவை சேர்க்கவும். அதனுடன் ஒரு டீஸ்பூன் கஷ்மிரி மிளகாய்த்தூள், அரை டீஸ்பூன் மஞ்சள்தூள், அரை டீஸ்பூன் ஆம்சூர் தூள், மற்றும் ஒரு டீஸ்பூன் உப்பு சேர்க்கவும். இவை எல்லாம் ஒன்றுடன் ஒன்று நன்றாக கலக்கும் வரை கரண்டி கொண்டு கலந்து விடவும்.

எல்லாம் நன்றாக கலந்தவுடன் அடுப்பை நிறுத்தி விடவும். பிறகு 3 ஸ்பூன் வினிகரை அதில் சேர்க்கவும். வினிகர் சேர்ப்பதால் ஊர்காய் கெடாமல் இருக்கும்.மேலும் ஊறுகாய்க்கு புளிப்பு தன்மை தரும். இந்த ஊறுகாயை ஒரு வாரம் வரை ஃப்ரிட்ஜில் வைத்திருந்து சாப்பிடலாம். தயிர் சாதத்திற்கும் சப்பாத்திக்கும் சரியான ஜோடி.